Центрите за социјална работа во фокусот на средбата во Министерството за социјална политика, демографија и млади

На барање на Синдикатот на УПОЗ, денеска во Министерството за социјална политика, демографија и млади се одржа работна средба со Заменик министерот Ѓоко Велковски и Државниот секретар Фатмир Сабриу. На оваа средба учествуваа претставници на Синдикатот на УПОЗ вработени во Центрите за социјална работа од Скопје, Тетово, Куманово и Велес.

Главниот фокус на оваа средба беа барањата на вработените во ЦСР, а особено изнаоѓање начин за зголемување на нивните плати.

Од страна на Заменик Министерот и Државниот секретар се изрази подготвеност да се изнајдат решенија за проблемите на вработените, а истите и информираа дека за дел од барањата на Синдикатот на УПОЗ веќе се преземени одредени чекори за нивно решавање.

Во врска со најболниот проблем на вработените, платите, се договори формирање на работни групи кој во најбрз можен рок ќе започнат со работа на Предлог – текстот на Колективниот договор на Синдикатот на УПОЗ, кој ќе ги опфати вработените во Центрите за социјална работа како и вработените во Министерството за социјална политика, демографија и млади.