Зголемување на платите во правосудството, исплата на додатоците на плата, измени на законите за судска и јавнообвинителска служба беа дел од прашањата на Синдикатот за кои се разговараше на средбата со Министерот Бојан Маричиќ.

На барање на Синдикатот на УПОЗ,  Претседателот на Синдикатот Пецо Грујовски и Генералниот секретар Трпе Деаноски одржаа  работна средба со Министерот за правда  г – дин Бојан Маричиќ.

Претставниците на Синдикатот на УПОЗ истакнаа дека од последното зголемување на платите во правосудството изминаа неколку години, а од тогаш до сега има постојан пораст на просечната плата на ниво на државата, пораст на минималната плата и зголемена инфлација која придонесува цените на основните производи за живот да бидат се повисоки. Ваквата состојба и фактот дека вработените во правосудството се многу поблиску до минималната плата отколку до просечната плата на ниво на држава мора да се измени во најбрз рок и Министерството за правда, Судскиот буџетски совет и јавното обвинителство мора да изнајдат средства за зголемување на платите на вработените.   

На средбата, Министерот информираше дека се подготвуваат посебни закони за пресметување на платите во судовите и обвинителствата односно, Закон за платите на судиите и Судската служба и Закон за платите на обвинителите и јавно обвинителската служба. По однос на овие два закони направени се средби и со Министерот за финансии во однос на зголемување на средствата за плати и во најскоро време работните групи ќе започнат со подготовка на текстот на овие закони.

Претставниците на Синдикатот на УПОЗ потенцираа дека измените на законите кои беа најавени многу се пролонгираа, а проблемите со кои секојдневно се соочуваат вработените не се решаваат туку се повеќе се зголемуваат. Од тие причини потребно е работните групи што побрзо да започнат со работа и да се донесат измени на законите за судска и јавнообинителска служба.

Министерот беше информиран и за селективната вакцинација на вработените во судовите и обвинителствата при што само судиите и обвинителите беа вакцинирани иако во Националната стратегија немаше назначено дека само одредена категорија на вработени ќе бидат приоритетно вакцинирани. Затоа беше побарано веднаш да се исправи неправдата и итно да се вакцинираат сите вработени во овие инстанци.

Претставниците на Синдикатот на УПОЗ побараа да се интензивираат и активностите околу потпишувањето на Колективниот договор за вработените во Министерството за правда при што министерот искажа подготвеност за негово потпишување.

Министерот за правда истакна дека Синдикатот на УПОЗ како репрезентативен синдикат активно ќе биде вклучен во подготовката на законите и дека ќе се земат во предвид сите барања кои ги доставил Синдикатот.

На средбата со Јавниот обвинител се разговараше и за унапредувањето на јавнообвинителските службеници, признавање на стекнатото образование, пополнување на испразнетите работни места и други прашања од интерес на јавнообвинителските службеници.

Претседателот на Синдикатот на работниците од управата, правосудните органи и здруженија на граѓани на РМ Пецо Грујовски, заедно со Генералниот секретар Трпе Деаноски и претседателот на синдикалната организација при јавните обвинителства Изабела Илиева остварија работна средба со Јавниот обвинител на Р. Македонија Љубомир Јовески и Генералниот секретар во јавното обвинителство Митко Митревски.

На оваа средба главна точка на разговор беа висината на платите и исплатата на додатоците на плата на јавнообвинителските службеници.

Претставниците на Синдикатот исто така ги отворија прашањата за можноста за унапредување на јавнообвинителските службеници, признавање на стекнатото образование со што би се добиле дополнителни бодови на плата за вработените, пополнување на испразнетите работни места и измени на Законот за јавнообвинителската служба   

Јавниот обвинител истакна дека од страна на обвинителството се преземаат чекори во рамките на буџетот на обвинителството за подобрување на состојбата на јавнообвинителските службеници, а исто така и во редовната комуникација со Министерството за правда се бара и носење на нови законски решенија со кои уште повеќе би се подобриле и зголемиле правата на вработените.

На крајот на средбата двете страни се согласија дека е потребно да се одржи и заедничка средба со Министерот за правда на која би се разговарало за сите отворени прашања и би се изнашле конкретни решенија за истите.

По неколку одржани состаноци со директорот на Агенцијата за вработување на С. Македонија, денеска работните групи од Синдикатот на УПОЗ и Агенцијата за вработување, започнаа со изготвување на текстот на Колективниот договор за вработените во АВРМ.

Работните групи ќе продолжат со работа и идната недела и очекуваме во најбрз рок да се потпише Колективниот договор со кој ќе се подобрат правата на вработените.