Денес, Синдикатот на работниците од управата, правосудните органи и здруженија на граѓани на РМ (УПОЗ), упати барање до Министерството за информатичко општество и администрација (МИОА) и побара поголема заштита на вработените на работните места, преку обезбедување на заштитни средства, доследно почитување на препораките за заштита, дво сменско работење и работење од дома.

Имајќи ги во предвид бројките на заразени кој за жал секој ден се сe поголеми како и целокупната состојба со вирусот Covid 19 во нашата држава, Синдикат на УПОЗ бара од надлежно министерство за вработените во државната управа да ги преземеме сите можни мерки за заштита на здравјето на вработените.

Од информациите кои ги добиваме од нашите синдикални организации се вели во барањето на Синдикатот на УПОЗ, можеме да заклучиме дека во институциите на државната управа мерките препорачани од страна на Владата или не се почитуваат или воопшто не можат да се применат. Ова е од причина што условите за работа на голем број вработени тоа воопшто не го дозволуваат и поради фактот дека голем број од работодавачите воопшто не се ни потрудија да обезбедат основни средства за заштита на здравјето на вработените.

Во барањето Синдикатот на УПОЗ укажува дека од почетокот на пандемијата во многу институции се покажа дека работата од дома со ништо не го нарушува нормалниот процес на работа. Бидејќи се најавува дека Владата и Собранието своите седници ќе ги одржуваат online, Синдикатот бара да се предвиди и овозможи работа од дома за вработените во државната управа. На овој начин ќе се спречи ширењето Covid 19, а работните задачи ќе бидат завршени навремено и ефикасно.

Исто така, Синдикатот на УПОЗ бара да се обезбедат и основни средства за заштита на здравјето на вработените (маски, средства за дезинфекција), да се создадат услови во канцелариите да се одржува растојание од 1.5 до 2 m, на сите шалтери да се постават паравани за заштита, да се воведе дво - сменско работење во институциите и друг вид заштита за да се намали бројот на вработени во канцелариите во исто време.

Денес во Министерството за информатичко општество и администрација, министерот Јетон Шаќири и претседателот на Синдикатот на работниците од управата правосудните органи и здруженија на граѓани на РМ (УПОЗ) имаа работна средба во врска со неколку актуелни прашања.

На средбата претседателот Пецо Грујовски го информираше министерот Јетон Шаќири за одредени проблеми и дилеми како и погрешното толкување на некои одредби од Гранскиот колективен договор за органите на државната управа, стручните служби на Владата на Република Северна Македонија, судовите, јавните обвинителства, казнено поправните установи и воспитно поправните установи, државното правобранителство, општините, Град Скопје и општините во градот Скопје, агенциите, фондовите и другите органи основани од Собранието на Република Северна Македонија. Во таа смисла на состанокот уште еднаш беше потенцирано дека одредбите од Колективниот договор мора доследно да се почитуваат. Некои работодавачи се уште на вработените не им исплаќаат патни и дневни трошоци, не ја почитуваат одредбата за флексибилно работно време а Владата, според наши сознанија нема предвидено средства со ребалансот на Буџетот за 2020 година.

Исто така, Министерството за финансии не го консултира Синдикатот на УПОЗ (согласно член 15 став 3 од Гранскиот колективен договор) во врска со ребалансот како и за Буџетот за 2021 година.

Заради доследна примена, особено во делот на паричните побарувања, беше договорено во наредните денови да се оствари средба со Министерството за финансии пред кого ќе бидат изнесени овие прашања со барање за доследна примена на Гранскиот колективен договор со цел да се надминат недоразбирањата и да не се доведат вработените во состојба своите права да ги реализираат преку суд.

Вчера заврши 31.вата синдикална школа на Синдикатот на УПОЗ на тема “АНАЛИЗА НА ГРАНСКИОТ КОЛЕКТИВЕН ДОГОВОР И ПОСЕБНИТЕ КОЛЕКТИВНИ ДОГОВОРИ НА НИВО НА РАБОТОДАВАЧ”.  Учество зедоа над 100 учесници, а радува фактот што учествуваа и претставници на работодавачите со цел да се запознаат во врска со практичната примена и толкување на колективните договори.

На 31.вата синдикална школа на Синдикатот на УПОЗ, учесниците разговараа и разменуваа мислења а проф. д-р Лазар Јовевски од Правниот факултет и Билјана Жагар Николовска советник за административни работи при Министерството за информатичко општество и администрација практично ги пренесоа своите искуства, а судијата Хилда Мешкова од Граѓанскиот суд Скопје низ практични примери ги запозна присутните доколку дојде до судски постапки.  

Покрај темата која се покажа доста интересна, третиот ден беше одржана и кратка презентација од Халк Банка, која подготви понуда само за членовите на Синдикатот на УПОЗ која ќе биде поставена по потпишување на договорот на веб страната на Синдикатот на УПОЗ. Исто така беше одржана и презентација од Халк Осигурување, која ги презентираше пакетите за приватно здравствено осигурување, што побуди интерес кај присутните.

На оваа синдикална школа, покрај едукативниот дел, третиот ден беше резервиран за доделување на плакети и признанија на членовите на Синдикатот на УПОЗ. Плакети за успешна работа на Гранскиот колективен договор добија членовите на работната група:

• Трпе Деаноски - Генерален секретар на Синдикатот на УПОЗ;
• Зоран Георгиевски - Државен завод за статистика и
• Алекандар Диље - Министерство за земјоделство, шумарство и водостопанство.

Исто така, со оглед што во последниве неколку години, беа потпишани повеќе посебни колективни договори на ниво на работодавач, на оваа синдикална школа беа доделени благодарници за следниве членови:

• Љубиша Јовановски - претседател на СО при Агенција за катастар на недвижности;
• Виктор Рајковски - претседател на СО при ЈП Службен весник на Р.С. Македонија
• Амир Шеји - претседател на СО при Општина Струга
• Вулнет Мурсели - претседател на СО при Фонд за здравствено осигурување на Р.С. Македонија
• Бранко Аџигогов - заменик претседател на СО при Фонд за здравствено осигурување на Р.С. Македонија
• Васко Арсов - претседател на СО при Државен инспекторат за земјоделство
• Зоран Павловски - претседател на СО при Општина Крива Паланка
• Тони Апостоловски - претседател на СО при Царинска управа на Р.С. Македонија
• Гордана Максимовска - претседател на СО при Општина Карпош
• Добри Петров - претседател на СО при Општина Гази Баба
• Димитар Гаќев - претседател на СО при Државен инспекторат за градежништво и урбанизам
• Александар Алексовски - претседател на СО при Општина Кисела Вода
• Лидија Неделковска - претседател на СО при Општина Центар и
• Игор Дамјаноски - претседател на СО при Демир Хисар.