Словенечката Влада го претстави т.н. “Мега корона Закон” со кој граѓаните и економијата ќе добијат три милијарди евра

Словенечката Влада, по дводневното заседание, конечно го усогласи и објави таканаречениот “Корона Закон” со кој граѓаните и компаниите ќе добијат директна државна финансиска помош од три милијарди евра. Целта на овие закони е да се ублажи финансискиот удар врз граѓаните и економијата поради епидемијата на корона вирусот.

Според одлуката, сите само вработени, кои поради епидемијата не можат да остварат соодветен приходи, ќе добијат помош од 700 евра, а државата ќе им ги плати и придонесите.

Помош од државата во висина од 150 евра ќе добијат и сите редовни студенти во Словенија.

Додаток на плата во висина од 100 евра ќе добијат и семејствата со три деца, а оние кои имаат повеќе ќе добијат државна помош од 200 евра месечно.

Државни пари на смета ќе добијат и пензионерите, а висината ќе зависи од тоа колкава им е пензијата. Оние со најниски пензии до 500 евра ќе добијат 300 евра помош, тие од 600 ќе добијат 230 евра од државата, а оние со пензии над 700 евра им следуваат 130 евра помош.

Дополнително, здравствените трошоци за време на епидемијата целосно ќе ги покрива Фондот за здравство, а не работодавачот. Оние кои се изложени на опасност поради својата работа за време на епидемијата ќе добиваат поголема плата од 10 до 200 отсто, а се препорачува и приватните компании да го следат истиот пример и на вработените кои се во ризик да им ги зголемат платите.

Функционерите именуван од Владата ќе добиваат 30 отсто помала плата за време на епидемијата.

Денес, Синдикатот на УПОЗ испрати соопштение до јавноста со кое укажува дека не е солидарно товарот од кризата да го понесат и оние со најниски примања кои и во нормални услови одвај го поминуваат месецот, задолжени со кредити со цел да опстанат и да обезбедат егзистенција за своите семејства. 

Синдикатот на работниците од управата, правосудните органи и здруженијата на граѓани на Р. Македонија  (УПОЗ), деновиве со загриженост ги проследи и последните настапи и изјави на челниците на владеачката партија, а во врска со предлог мерките со кои на вработените во администацијата и јавниот сектор за месеците април и мај треба да им се исплати минимална плата.

Синдикатот на УПОЗ и натаму смета дека вака предложените мерки се избрзани, популистички и не одржливи, особено по искажаната проценка дека вкупната заштеда од исплата на минимилна плата за два месеци на администрацијата и јавниот сектор е 30 милиони евра. За нас не е сфатливо зошто само во нашата држава се инсистира на кратење на платите до ниво на минимална плата и тоа од нај ниско платените, иако скоро сите држави во регионот и пошироко со превземените економски мерки воопшто или само процентуално ги намалуваат платите на вработените.

Изедначување на платите на фунционерите чии месечни примања се над 60.000,00 денари, со платите на вработените кои земаат 17.000,00 денари, не само што не е солидарно туку е и неспоредливо. Ова особено ако се земе во предвид фактот дека повеќе од половина министри, пратеници, директори и членови на управните одбори имаат сопствени бизниси, а и доколку немаат, само платите кои им ги дава државата се доволни за заштеди со кои не само што можат да издржат повеќе од два месеци, туку по завршување на кризата со исплата на бонуси и дневници повеќе од два пати ќе си ги вратат намалените износи.

Со вака предвидената мерка се создава дополнителен јаз и нееднаквост на вработените, а особено кај вработените од Категоријата Г (референти) во администрацијата чија максимална плата изнесува 16.474,00 денари, самохраните родители, родителите на деца со посебни потреби, вработени кои во семејството имаат болни од тешки хронични заболувања, како и на вработените кои се единествени вработени во семејствата. Изгледа дека никој не ги има земено во предвид режиските трошоци кои ниту се одложени ниту пак намалени и набавките на вработените со административна забрана. Без да се земат во предвид овие фактори, со исплатата на минимална плата на администрацијата не само што ќе се намали потрошувачката моќ на овие вработени, туку истата ќе биде непостоечка.

Поради ова Синдикатот на УПОЗ апелира до Владата, повикувајќи се на начелото на солидарност и од уставната одредба според која Р.С. Македонија е социјална држава,  да не го прифати предлогот за намаување на платите во администрацијата особено на оние чија плата е под државниот просек од 25.200,00 денари. Предлагаме сите избрани функционери (министрите, пратениците, членовите на управните и извршните одбори и др.) да го следат примерот на Министерката за финансии и во целост да се откажат од своите месечни примања се додека трае кризата, а со цел да и помогнат на државата. Само на тој начин ќе се покаже вистинска солидарност, бидејќи солидарност не е товарот да го понесат најмалку платените вработени.

Исто така предлагаме, државата за период од два месеци да го превземе плаќањето на придонесите за сите вработени, а здравствените трошоци за време на епидемијата да ги покрива Фондот за здравствено осигурување, а не работодавачите.

Но доколку намалувањето на платите во администрацијата сепак е нужно предлагаме друго решение и намалувањето да се однесува само на оние кои имаат повисоки плати од просечната плата во државата и тоа:

• На вработените во Категоријата А (секретари) согласно Законот за административни службеници намалување од 30%;
• На вработените во категоријата Б (раководители) намалување од 20%;
• На вработените во Категоријата В групи В1 и В2 намалување од 10%.

Затоа во оваа прилика уште еднаш сакаме да апелираме до Владата при разгледување на предложените мерки од политичките партии и носење на Одлука по истите, а со цел да не се предизвикаат социјални немири, во преден план да ја има економската и материјалната состојба на вработените и како истата да се подобри во ова време на криза, а не вработените да се доведат во ситуација да не можат да ги подмират основните потреби за живот.    

Денес Синдикатот на УПОЗ писмено се обрати до Владата на РСМ и Министерството за информатичко општество и администрација кое ви го пренесуваме во целост. 

"Синдикатот на работниците од управата, правосудните органи и здруженијата на граѓани на Р. Македонија  (УПОЗ), како репрезентативен Синдикат  свесен за моментот во кој се наоѓа земјата и потребите од единство, солидарност, меѓусебно помагање и одговорност на сите граѓани, денес се обрати со барање до Владата на Р. С. Македонија во врска со предлогот изнесен од претседателот на Социјалдемократскиот сојуз (СДСМ) г- динот Зоран Заев.

Синдикатот на УПОЗ смета дека предложената мерка во делот на платите е дискриминаторска бидејќи јавната администрација и јавниот сектор се ставаат во понеповолна положба во однос на другите вработени. Предложената мерка за исплаќање на минимална плата за месеците април и мај за јавната администрација сметаме дека не е добро осмислена и таа остава само привид на некаква лажна солидарност. Доколку Владата го прифати овој предлог, значително ќе биде загрозена егзистенцијата на илјадници вработени во јавната администрација чии плати и онака се под просечната плата во државата.

Точно е дека финансискиот товар од кризата треба да го поделиме сите, ама тоа не значи дека целиот цех треба да го платат работниците и сиромашните, а олигарсите, бизнисмените, богаташите и големите компании да останат поштедени.

Доколку Владата смета дека и јавната администрација и јавниот сектор треба да понесат дел од товарот во кризата, сметаме дека има поприфатливи решенија и варијанти со кои ќе се покаже поголема солидарност спрема вработените, но никако минимална плата за сите категории вработени.

Јавната администрација е постојано на удар, а сепак тие се луѓе кои чесно ја заработуваат својата плата, огромен број од нив едвај врзуваат крај со крај и живеат на рати и кредити. Со оглед на тоа што над 75% од јавната администрација имаат плати пониски од државниот просек и во нормални услови едвај преживуваат, Синдикатот на УПОЗ предлага да не се задира во ниту една плата која е под републичкиот просек.

Синдикатот на УПОЗ укажува дека при донесување на одлуката, Владата мора да има во предвид и некои други показатели, дека со исплата на минималната плата особено ќе бидат погодени самохраните родители, родителите на деца со посебни потреби, вработените кои живат под кирија и оние кои се единствени вработени во нивните семејства.

За Синдикатот на УПОЗ предлогот за исплата на минимална плата е неприфатлив и од аспект што не е земено во предвид работењето на Царинската управа, Управата за јавни приходи, инспекциските служби, пожарникарите, судовите и судската полиција кои и покрај сите препораки за скратувањето на работното време и работа од дома, работат со полно работно време, секојдневно се на терен без заштитна опрема и ги извршуваат своите работни задачи."