Барањата содржат дел од приоритетните прашања кои во изминатиот период се наметнаа како суштински за вработените во управата и правосудството.

Синдикатот на работниците од управата, правосудните органи и здруженијата на граѓани на Р. Македонија (УПОЗ), денес, до политичките партии кои ќе учествуваат на претстојните парламентарни избори упати барања со кои побара унапредување на правата од работен однос на вработените во администрацијата и правосудството.

Барањата се испратени до сите политички партии  и сметаме дека тие се од голема важност за вработените во администрацијата и правосудството.

1. Доследна примена на одредбите од колективните договори и афирмирање на социјалното партнерство;
2. Сразмерен раст на платите во администрацијата и правосудството со порастот на минималната плата;
3. Најавената реформа и спојувањето на институции во администрацијата да се спроведе без губење на работните места, особено на референтите кои се со најниски плати во државата;
4. Мораториум за нови вработувања и вработувања на определено време се додека не се исцрпат можностите за унапредување на вработените во администрацијата и правосудството;
5. Укинување на одредбите од Законот за извршување на буџет кои ја ограничуваат или стопираат исплатата на надоместоците и додатоците на плата за вработените;
6. Измена на законските оредби со кои ќе се предвиди Колективните договори да важат исклучиво за членовите на Синдикатот;   
7. Коренити реформи во судовите и јавните обвинителства и усогласување на платите на судските и јавнообвинителските службеници со платите на судиите и обвинителите.

Ова се само дел од барањата кои Синдикатот на УПОЗ ги упати до политичките партии и воедно ги повика одговорите да ги достават најдоцна до 08.07.2020 година, на e-mail адресата на Синдикатот Оваа е-адреса е заштитена од спамботови. Треба да ви е овозможено JavaScript за да ја видите..

Исто така, Синдикатот на УПОЗ изразува подготвеност да одржи работни средби со политичките партии на кои дополнително ќе ги образложи своите барања.

Во пресрет на претстојните парламентарни избори, Синдикатот на работниците од управата, правосудниет органи и здруженија на граѓани на РМ (УПОЗ), на ден 19.06.2020 година писмено се обрати до Државната изборна комисија со цел членовите на избирачките одбори и комисии да се заштитат од вирусот Ковид - 19, како и со барање за исплата на поголеми награди за вработените во ДИК и избирачките одбори и комисии. 

Во продолжение Ви го пренесуваме во целост писмото: 

Синдикатот на работниците од управата, правосудните органи и здруженијата на граѓани на Р. Македонија (УПОЗ), бара од надлежните институции за претстојните парламентарни избори,  да ги преземат сите мерки на заштита за вработените од Државната изборна комисија (ДИК) и вработените административни службеници кои како членови на избирачките комисии и избирачките одбори ќе бидат вклучени во изборите.

Имајќи ја во предвид секојдневната растечка бројка на заразени од вирусот Ковид – 19, не можеме да не бидеме загрижени од опасноста, голем број вработени во државната администрација да бидат изложени на опасност од зараза од вирусот Ковид – 19, бидејќи 2700-те избирачки места, обично се училници, канцеларии во општини или месни заедници кои по квадратура не се соодветни за одржување на избори во време на пандемија. Ова особено ако се земе предвид фактот дека секој избирачки одбор е составен од пет члена, кои имаат свои заменици, а на изборите ќе се појават 14 коалиции со свои посматрачи. Така, може да се случи, во една просторија со површина околу 20 метри квадратни, во исто време да бидат присутни 20 лица.

Членовите на избирачките одбори и избирачките комисии кои се избираат по случаен избор од вработените во администрацијата и јавниот сектор, согласно Законот за административните службеници (ЗАС) се должни да учествуваат во спроведување на изборната постапка, а може да не ја прифатат должноста само од здравствени или семејни причини за што треба да достават писмен доказ.

Поради ова Синдикатот на УПОЗ бара хронично болните и вработените кои се родители на деца под 10 години да бидат изземени од должноста за учество и спроведување на изборната постапка. Исто така, бараме  членовите на избирачките одбори и посматрачите во избирачките места да се ротираат и за истите да биде обезбедена заштитна опрема и заштитни средства, како и да се почитуваат сите протоколи за безбедно растојание од минимум два метри во секое избирачко место.

Со оглед на тоа што ДИК до сега до своите вработени во подрачните одделенија нема испратено никакви напатствија за тоа како вработените во ДИК и членовите на избирачките комисии и одбори да го заштитат своето здравје, а од почетокот на кризата до сега на вработените се уште не им се обезбедени маски и средства за дезинфекција согласно препораките од Владата, бараме итно да се преземат мерки и активности за заштита на здравјето и безбедноста на овие вработени.

Иако политичките партии се сретнаа неколку пати и се договараа за датумот на изборите ниту една политичка партија изгледа не размислувала за вработените кои ќе ги спроведуваат изборите ниту пак каква заштита би добиле вработените кои со своето учество во изборите би се заразиле од вирусот Ковид – 19?

Поради тоа бараме, доколку вработените кои ќе учествуваат во изборниот процес се заразат од вирусот Ковид – 19, да имаат право на исплата на 100% од боледувањето, Државната изборна комисија да издвои поголеми средства за хонорари за избирачките комисии и избирачките одбори поради високиот ризик од зараза, и сите вработени кои учествувале во изборите наредниот ден да бидат ослободени од работните обврски.

На 12.06.2020 година, Синдикатот на УПОЗ и Царинската управа на Р.С. Македонија потпишаа Колективен договор за вработените во царинската управа.

Во 2009 година, под притисок од страна на работодавачот, Синдикална организација при Царинската управа членка на Синдикатот на УПОЗ беше расформирана заради неприфаќањето на Синдикатот на УПОЗ да потпише Колективен договор со одредби по желба на тогашниот директор.

Во 2018 година, по цели 11 години, вработените повторно се организираа и формираа синдикална организација а во Синдикат на УПОЗ препознаа Синдикат кој ќе ги застапува вработените пред работодавачот во остварување на поголеми права од работен однос. За цели две години, синдикалната организација при Царинската управа веќе брои повеќе од 500 членови.

Двете страни извесен период работеа на подготовка на текстот на колективниот договор со желба да се унапредуваат и уредат сите специфики на работењето на вработените во Царинската управа.

Како поголеми придобивки со потпишувањето на Колективниот договор можеме да го издвоиме регресот за годишен одмор, исплата на теренски додаток, зголемен број на денови за платените отсуства, поголема пауза за вработените кои работат повеќе од 12 часа итн.  

Претседателот на УПОЗ Пецо Грујовски, претседателот на Синдикалната организација Тони Апостоловски и Директорот на Царинската управа Ѓоко Танаскоски го истакнаа  своето задоволство од соработката и од крајниот резултат. Особено беше потенцирано дека е битно одредбите од овој Колективен договор да се почитуваат и да се применуваат како од страна на работодавачот така и од вработените.