Денес пред Царинската управа, вработените и членови на Синдикатот на УПОЗ одржаа предупредувачки протест кој беше организиран со едно единствено барање а тоа е Правилна примена на членот 67 став 3 од Законот за царинската управа во кој е наведено дека “Царинските службеници добиваат 30% од платата како надополнување на редовната плата поради посебните работни услови, како и поради посебната одговорност која произлегува од работното место“.
Иако овој став е содржан и во Колективниот договор за вработените во Царинската управа, ниту еден вработен никогаш не го добил овој додаток на плата и овој додаток до сега ниту еднаш не е наведен на платните листи кои им се издаваат на вработените.
Со Законот за буџетите и со автентичното толкување на членот 66 од овој Закон, Министерството за финансии и сите органи во министерството за финансии добија додаток на плата во висина од 30%. Иако, Царинската управа е орган во состав на Министерството за финансии и се понадевавме дека конечно и на вработените во Царината ќе им се исплати овој додаток, одговорот повторно беше негативен.
Овие вработени кои денес се излезени на протест со извршување на нивните работни задачи го полнат државниот буџет за повеќе од 51% секоја година, носат оружје, вршат претреси, изложени се на висок ризик и не бараат ништо повеќе од тоа да се почитува и правилно да се применува Колективниот договор и Законот за царинската управа.
Вработените во Царинската управа, денеска одлучија да се изрази револтот на мирен начин, за време на пауза и да не се нарушува работниот процес со цел граѓаните на Р. Македонија да можат да патуваат, а приватниот сектор и стопанството да имаат слободен увоз и извоз на стока.
Со оглед на тоа што Царинската управа има нов директор, Синдикатот на УПОЗ очекува ова да биде негова прва работна задача и сме спремни да оствариме работна средба на која ќе договориме рокови за решавање на овој проблем.
Нашето барање е праведно и правично, законски издржано и како што вика нашиот народ не бараме преку леб погача туку го бараме само она што ни следува.
