Синдикатот на УПОЗ испрати писмено барање до Судскиот буџетски совет за правилна исплата на додатоците и надоместоците на плата, но и исплата на разликата на додатоците на плата за последните три години.

Во натамошниот текст, Ви го пренесуваме барањето на Синдикатот на УПОЗ.  

“Согласно одредбите на Законот за судска служба и Правилникот за додатоци на плата, нивната висина и начинот на утврдување за судските службеници (бр.01-285/1 од 13.02.2019 година), судскиот буџетски совет изминатите години неправилно ја исплаќаше разликата во додатоци и надоместоци на плата, на начин што не ја зголемуваше основицата на платата со процентот на работното искуство на судските службеници.

Имено, согласно член 65 став 1 од Законот за судската служба вработениот во судската служба има право на плата и надоместоци од плата, која што одговара на неговото работно место според услови и критериуми утврдени со овој закон и/или колективен договор, додека пак согласно став 2 платите и надоместоците од плата на вработените во судската служба се обезбедуваат од судскиот буџет.

Во член 66 од Законот за судска служба е предвидено дела платата на судскиот службеник се состои од следните компоненти: основна компонента и исклучителна компонента.

Во член 1 од Правилникот за додатоци на плата, нивната висина и начинот на утврдување за судските службеници (бр.01-285/1 од 13.02.2019 година), се уредуваат додатоците на плата, нивната висина и начинот на утврдување за судските службеници во Врховниот суд, Вишиот управен суд, апелационите и основните судови.

Членот 7 од Правилникот ја регулира висината на платата на судските службеници во процентуален износ од основната плата за судскиот службеник и тоа:

• Посебни услови за работа во висина од 5%;
• Постоење на висок ризик во висина од 10%;
• Доверливост во висина од 10%, и
• Ноќна работа, работа во смени и прекувремена работа во висина до 10%.

Во член 8 од правилникот е предвидено дека додатоците на плата од членот 2 меѓусебно не се исклучуваат.

Во член 67 став 4 од Законот за судската служба е предвидено: Работното искуство на судскиот службеник се вреднува во износ од 0.5% во делот на основната плата со која се вреднува образованието и додатокот на плата за звање, за секоја навршена година работен стаж, а најмногу до 20%.

Согласно на се горе наведеното бараме во рок од 8 дена Судскиот буџетски совет доброволно да ги исплати задоцнетите обврски за секој судски службеник посебно, а притоа да има во предвид дека овие обврски треба да се исплатат ретроактивно за три години.

Доколку решите да не постапите по ова наше барање Ве известуваме дека Синдикатот на УПОЗ ќе преземе законски дејствија и ќе го застапува секој вработен посебно со цел остварување на ова право.”

Во просториите на Синдикатот на УПОЗ, денес се потпиша Анексот на Колективниот договор за вработените во Општина Ресен. 

Овој Анекс на Колективниот договор од страна на Синдикатот на УПОЗ го потпишаа Претседателот на Синдикатот на УПОЗ Трпе Деаноски и претседателот на Синдикалната организација при Општина Ресен Миле Чадески од едната страна и Градоначалникот на Општина Ресен Јован Тозиевски од другата страна.

Со овој Анекс на колективниот договор, е предвидено усогласување на сите плати со минималната плата, што е на задоволство на сите вработени во општината. 

Незаинтересираноста на Владата да ги почитува правата од Колективниот договор за државната управа, локалната самоуправа и правосудните органи, Синдикатот на работниците од управата, правосудните органи и здруженијата на граѓани (Синдикат на УПОЗ), покрена активности за остварување на правото на регрес за годишен одмор за 2020 година по судски пат.

Иако Синдикатот на УПОЗ се обидуваше во изминатиот период низ разговори со Владата да најде заедничко прифатливо решение, до тоа не дојде. Со цел да не настане застарување на ова право, Синдикатот е принуден тоа да го оствари по судски пат.

Владата на Република Северна Македонија и покрај сознанието дека веќе има правосилни судски пресуди, не се ни обиде да најде начин да ја исполни оваа обврска од колективниот договор. Со остварување на ова право по судски пат, Буџетот на државата ќе биде оштетен дополнително за судски, адвокатски такси и трошоци за извршителите, односно три пати повеќе.

Заради остварување на правото на неисплатен регрес за годишен одмор за 2020 година, Синдикатот на УПОЗ преку претседателите на синдикалните организации, презеде активности за доставување на полномошна од членовите за поведување на судска постапка. Синдикатот на УПОЗ преку неговата правна служба пред судовите бесплатно ќе ги застапува своите членови.

Сметаме дека ова е сериозно прашање за државата заради тоа што ќе биде оштетен нејзиниот Буџет и доколку дојде до тоа, Синдикатот на УПОЗ, дополнително ќе поднесе кривична пријава заради тоа што и покрај обврската, некој не предвидел средства за оваа намена и со тоа дозволил да се направи огромна финансиска штета.

При ова сакаме да напоменеме дека Владата на Република Северна Македонија, ниту со Буџетот, ниту со ребалансот за оваа година не предвиде средства за оваа намена. Согласно колективниот договор, доколку за оваа 2022 година, заклучно со 31.12. не биде исплатен регресот, ќе следат нови тужби.

Со оглед на тоа што регресот за 2021 година Владата го исплати а за 2020 не сака ни да чуе, а за 2022 година не предвиделе средства во Буџетот, тоа ги девалвира колективните договори и обврските кои ги презема и смета дека ако таа сака, ќе ги реализира, ако не, не мора, неводејќи сметка за последиците.