Синдикатот на работниците од управата, правосудните органи и здруженијата на граѓани на Р. Македонија (УПОЗ), бара Судскиот буџетски совет и претседателот Караџоски да ја повлечат Одлуката за исплата на додатоци на плата за судиите во износ од 35% со што судиите ќе добијат зголемување за 21.000,00 денари, што ќе биде повисоко за 85% од редовните плати кои ги добиваат вработените во судската служба. Оваа срамна Одлука е долевање на масло на огнот кој гори од незадоволството од третманот на судските службеници во изминатите години, замрзнување на нивните плати и постојано зголемување на платите на судиите. Таа во ниту еден случај не може да ја подобри материјалната и социјално -  економската положба на вработените во администрацијата и правосудството.

Од овие причини Синдикатот на УПОЗ бара итна и неотповиклива оставка од Претседателот на Судскиот буџетски совет Зоран Караџоски и комплетниот состав на Судскиот буџетски совет, заради не поседување на морални вредности и предизвикување на состојба на хаос во судството.

,,Со оваа Одлука, Судскиот буџетски совет ја постигна целта и направи хаос и од тие причини можам слободно да кажам дека не гарантирам дека судовите ќе работат и како ќе работат бидејќи револтот е огромен што мислам дека Караџоски треба да ги посети сите судови и да им објасни како дојде до ова и дали има намера нешто да се направи во поглед на нивните барања”, изјави претседателот на Синдикатот на УПОЗ Пецо Грујовски на конференцијата за медиумите. 

Притоа Грујовски потсети дека во 2016 година судските службеници штрајкуваа токму поради овој дел од Законот за судски  службеници со цел да иницира промени со кои и судските службеници ќе бидат рамноправни во делот на додатоци на плати со судиите, јавно обвинителските служби и обвинителите. Тука е и дефектот. Извршната власт направи проблем, не беше ажурна и по речиси две години од нејзиното доаѓање не ги даде во процедура измените на Законот со коишто и судските службеници ќе бидат изедначени.

,,Од  тие причини бараме од Судскиот буџетски совет итно да ја отповика Одлуката за додатоци на судиите се до донесување на измените на Законот во итна постапка кој, пак, бараме да влезе во процедура веднаш во понеделник и со тоа судските службеници да бидат рамноправни и со судиите и со другите во правниот систем. Бараме потпишување во понеделник со претседателот на Судскиот буџетски совет како работодавач на вработените во судовите на Спогодба за да се вратат парите на вработените од судовите кои во 2016 година кои незаконски беа одземени за време на штрајкот во судовите лично од него што беше еден од поголемите негови гафови”, потенцираше на конференцијата за медиумите претседателот на Синдикатот на УПОЗ Пецо Грујовски.

Исто така, тој побара и поддршка и солидарност од судиите, како и тоа Здружението на судии да се  произнесе во врска со ова прашање бидејќи во судовите не работат само судиите.

Го постави и прашањето на легитимноста на донесената Одлука со оглед на фактот што Синдикатот тврди дека мандатот на Судскиот буџетски совет е веќе истечен. Синдикатот на УПОЗ заедно со Здружението на судските служби ќе донесат одлука за изразување на незадоволство која може да биде во вид на бојкотирање, штрајк и слично.

На прашањето на новинарите дали ќе го поддржат најавениот протест на КСС, Грујовски рече дека тие како Синдикат на УПОЗ се синдикат со најмногу штрајкови и протести и дека тогаш нив никој не ги поддржувал иако смета дека секоја борба за подобрување на правата на работниците е за поддршка

Како што беше договорено на Годишната конференција на Синдикатот на УПОЗ одржана на 06.11.2018 година, Министерството за правда организираше заедничка средба на Синдикатот на УПОЗ со Претседателот на Судскиот буџетски совет Зоран Караџовски.

Претседателот на Синдикатот на УПОЗ Пецо Грујовски заедно со Генералниот Секретар Трпе Деаноски, денес остварија работна средба организирана од Министерот за правда Проф. Д-р Рената Дескоска, со Претседателот на Судскиот Совет Зоран Караџовски за изнаоѓање конечни решенија во врска со враќањето на задржаните средства за време на штрајкот одржан во 2016 година и измените на Законот за судска служба во делот на додатоците на плата.

За двете прашања беше постигната согласност дека треба да се интензивираат и реализираат во најкус рок, заради што во наредната недела ќе се одржат работни состаноци за конечно затварање на овие две отворени и суштински прашања битни за судската служба.

На 22 октомври 2018 година, во Владата на РМ се одржа работен состанок меѓу претставниците на Владата на чело со претседателот Зоран Заев и претставниците на синдикатите, членки на ССМ. На средбата стана збор за повеќе актуелни прашања од сферата на трудот, а особено околу донесувањето на нов Закон за работните односи и Закон за синдикати и здруженија на работодавачи. Генералниот заклучок е дека евидентен е напредокот на социјалниот дијалог, но тој мора и натаму да се унапредува и не смее да има формален карактер.

 Претседателот на Владата на Република Македонија, Зоран Заев заедно со министерката за труд и социјална политика, Мила Царовска и заменик министерот за информатичко општество и администрација, Александар Бајдевски во Владата на РМ остварија работен состанок со Претседателството на Сојузот на синдикати на Македонија.

Во рамките на овој работен состанок се отвори дебата за надминување на проблемите и состојбите со кои се соочуваат синдикатите, а се разговараше и за законските одредби од новиот Закон за работните односи чијашто цел е да ги унапреди правата на работниците и безбедноста при работа, синдикалното организирање и начините за утврдување на репрезентативноста на синдикатите.

Премиерот Заев порача дека Владата на РМ останува цврсто на определбите да работи за унапредување на правата на работниците во соработка и партнерски однос со синдикатите и работодавачите. Во таа насока, премиерот Заев рече дека политиките за зголемување на платите кои продолжуваат и во Буџетот за 2019 година се значаен чекор за подобрување на животниот стандард на работниците.

Тој посочи дека синдикатите мора да бидат будното око за правата на работниците и за таа цел мора да се работи на зајакнување на синдикалното организирање.

Средбата беше значајна од аспект на тоа што повторно по 12 години се воспоставува праксата на одржување на средби помеѓу ССМ и Владата на РМ. Ова е од особено значење за унапредување на социјалниот дијалог бидејќи на овој начин се отвора можност сите прашања со кои се засегнати работниците и синдикатите да бидат пренесени и дискутирани директно со претставниците на Извршната власт.

На средбата од присутните синдикати од јавниот сектор беше поставено прашањето за потпишување на Колективен договор за јавниот сектор. Во таа насока, зборуваше и претседателот на Синдикатот на УПОЗ Пецо Грујовски кој истакна дека евидентен е напредокот на социјалниот дијалог, но тој мора и натаму да се унапредува и не смее да има формален карактер.

Грујовски ја поздрави одлуката за промена на работното време, спогодбеното решавање на степенот на кариера на административните службеници со цел да се избегнат судските постапки постигнати како резултат на дијалогот со Синдикатот на УПОЗ и како резултат на политиките на Владата на РМ.

Претседателот Грујовски посебно се осврна на политиката на Владата за зголемување на платите во некои сегменти во јавниот сектор. Тој истакна дека Синдикатот на УПОЗ секогаш ќе ја поддржува секоја одлука на Владата на РМ, особено за зголемување на платите, но воедно смета дека зголемувањето на платите не треба да биде селективно и затоа ќе се залага за промена на Законот за плати. Посебно реагираше на фактот што оваа година административните службеници и покрај ветување за покачување на платите, во септември не ги добија ветените 5%. Притоа тој се заложи за поправедно зголемување на платите низ дијалог со синдикатите и нивно регулирање со Колективен договор.

Грујовски потенцираше дека некои одлуки и договори со Владата одредени работодавачи не ги почитуваат, како што е одлуката за работното време бидејќи во многу установи е фиксно и не е дозволено флексибилно работно време, односно доаѓање и одење на и од работа во време од еден час. Исто е и со степенот на кариера, отпорот околу потпишување на колективни договори, но и несоработка и непочитување на Синдикатот на УПОЗ како социјален партнер кој е и репрезент на вработените.

Претседателот на Синдикатот на УПОЗ особено го истакна нереализирањето и неисполнето ветување договореното на состанокот со Владата на РМ на 27.12.2017 година за враќањето на незаконски задржаните средства за време на штрајкот во 2016 година во судовите.

Да потсетиме. Владеачката партија додека беше во опозиција вети дека по преземањето на власта и формирањето на сегашната Влада задржаните средства за штрајкот во 2016 година веднаш ќе бидат вратени на вработените и ќе отпочне со промена на Законот за судска служба во поглед на додатоците на плата за сложеност на работа, но и по две години Законот се уште не е влезен во собраниска процедура.