Претседателот на Синдикатот на работниците од управата, правосудните органи и здруженија на граѓани на РМ (УПОЗ) Пецo Груjoвски учествуваше на јавната расправа за Предлог законот за инспекциски надзор каде што пред почетокот даде изјава во врска со најавите на Владата на Република Македонија за реформите во администрацијата и за најавите дека на крајот на следната година ќе има понуда до дел од вработените во администрацијата да заминат во приватниот сектор.

При тоа тој рече дека во поглед на изјавите околу наводниот вишок на јавната администрација како Синдикат се малку затекнати бидејќи во првичните преговори со Владата и од јавните изјави на ресорниот министер за информатичко општество и администрација Дамјан Манчевски  и на премиерот на Владата на РМ Зоран Заев им било кажано дека ниту еден јавен службеник од јавната администрација нема да биде отпуштен од работа.

Претседателот на Синдикатот на УПОЗ Грујовски рече нема информации дека некој од членството сака да премине во реалниот сектор и потенцираше: ,,Ќе бидеме во тек со овој процес и се надевам дека ќе имаме коректни разговори со ресорното Министерство бидејќи искуствата покажуваат оти реформите на јавната администрација се прават повеќе години и во исклучителна соработка со  Синдикатот. За нас како Синдикат и она што можеме да влијаеме е првин да се избориме за правата на нашите членови а потоа и за секој вработен да има социјална сигурност, односно да го задржи работното место”, изјави Грујовски.

Тој нема сознанија дали администрацијата е преобемна, но, како што рече, во секојдневното работење се соочиле со укажувања од членството дека четири шалтери опслужуваат по 2000 граѓани. Дали при ова можеме да зборуваме за неажурна администрација?

Претседателот на Синдикатот на УПОЗ се осврна и на тековните преговори во врска со потпишувањето на Гранскиот колективен договор за административните службеници, службениците вработени во правосудните органи и другите вработени во државната управа и правосудните органи и рече: ,,Имаме коректни  преговори досега во поглед на потпишување на колективниот договор и се надевам дека во натамошната постапка околу вишокот работници ќе бидеме вклучени, но како Синдикат во однос на натамошните активности ќе се залагаме членовите на Синдикатот да ги зачуваат своите работни места. Со сите законски решенија кои ќе се нудат се залагаме за подобри права на административните службеници, дури и за оние кои не се членови ќе се заложиме за нивна социјална сигурност или задржување на работното место ако не во таа институција во некоја соодветна”, изјави Грујовски.  

Од друга страна министерот за информатичко општество и администрација Дамјан Манчевски го повтори ставот дека во администрацијата има превработеност, но и недостаток од професионален кадар и дека за тоа ќе мора да се најде решение. Рече дека на крајот на следната година ќе им се понуди на дел од вработените во администрацијата да заминат во приватниот сектор, а тоа ќе биде доброволно за тие што ќе ги прифатат критериумите. Најави поголеми плати, но и повеќе работа. Според него администрацијата мора да стане ефикасна служба на граѓаните и дека тоа може да се направи со дигитализација на процесите и со реорганизација.

Синдикатот на работниците од управата, правосудните органи и здруженијата на граѓани на Р. Македонија (УПОЗ), реагира на висината на најавеното зголемување на платите во јавната администрација бидејќи истото во ниту еден случај не може да ја подобри материјалната и социјално - економската положба на вработените во администрацијата и правосудството.

Разочарувачки е да се каже, но скоро 70% од вработените во државната администрација и правосудство примаат плата која е под просекот на државата. Моменталната нето плата на вработен во државна администрација со 25 години стаж во работењето и високо образование се движи од 20.000,00 денари до 22.000,00 денари. Дури и со зголемување на платите од 5% повторно процентот на вработени во државната администрација и правосудство кои имаат примања под републичкиот просек ќе биде огромен.

 Последното зголемување на платите во државната администрација беше во 2014 година, а сите други додатоци и надоместоци на плата се замрзнаа со мерките на штедење воведени во 2008 година, и со фамозниот Закон за извршување на буџет кој не дозволува исплата на ниту едно право кое го имаат вработените во администрацијата и правосудството.

Во изминатиот период бевме сведоци на исплата на огромни средства на име патни трошоци на пратениците во Собранието на Р. Македонија кои достигнуваа и до 12.000,00 евра за 6 месеци, а кога вработените во администрацијата се упатуваат на извршување на работни задачи надвор од местото на работење не само што не им се исплаќаат патни трошоци туку користат сопствени возила, самите ги плаќаат трошоците за пат и гориво, не им се исплаќаат прекувремени часови, а на крај не им се надоместуваат трошоците за службените патувања.

Во буџетот за 2019 година, предвидени се 50 милиони евра за покривање на дупките во буџетите на општините направени од не домаќинско работење на градоначалниците, во судскиот буџет редовно остануваат не искористени средства, но кога ќе стане збор за реално покачување на платите на вработените секогаш одговорот е дека Буџетот нема доволно средства. 

Во текот на вчерашната презентацијата на Буџетот, Министерот за финансии истакна дека администрацијата ќе биде клучен носител на преговорите за приклучување кон НАТО и ЕУ, а ние прашуваме како ќе се мотивира администрацијата која има месечни примања далеку помали од Синдикалната минимална кошница која за месец октомври 2018 година изнесува 32.507,00 денари, да биде клучен носител на пристапните преговори?  

Синдикатот на УПОЗ е подготвен да преговара за измени во политиката и системот за пресметка и исплата на плати во државната администрација со кој конечно би се исплаќале реални плати на вработените, а воедно би се зајакнала и нивната материјална и социјално -  економска состојба. 

Се дотогаш ваквите покачувања со одложена примена и кои во ниту еден случај нема да ја подобрат материјалната состојба на вработените нема да допринесат кон ништо друго освен кон зголемување на незадоволството на вработените.

На конференцијата на Синдикатот на работниците од управата, правосудните органи и здруженија на граѓани на РМ која се одржа на 06.11.2018 година и на која учествуваа Министерот за информатичко општество и администрација Дамјан Манчевски и Министерот за прада Проф. д-р Рената Дескоска и нејзиниот заменик Оливер Ристоски главна тема на расправа беа неколку прашања: потпишување на Гранскиот колективен договор за административните службеници, службениците вработени во правосудните органи и другите вработени во државната управа и правосудните органи, зголемување на платите на административните и вработените во правосудството (судски службеници, јавно - обвинителски службеници и вработените во КПУ и ВПУ)  и другите вработени во јавната администрација, Измени на Законот за судска служба во делот на додатоците на плата и нивна исплата, враќање на незаконски одземените плати на судските службеници за време на штрајкот во 2016 година, исплата на додатоците на плата на јавно обинителските службеници и уште многу други прашања значајни за правата од работен однос за членовите на Синдикатот на УПОЗ.

Синдикатот на работниците од управата, правосудните органи и здруженија на граѓани на РМ (УПОЗ) го одржа годишниот состанок на кој учествуваа сите претседатели на синдикалните организации членки на Синдикатот на УПОЗ, како и претставници на членовите на Советот на ССМ од Синдикатот на УПОЗ, Надзорниот одбор, Статутарната комисија, Секцијата на млади и Секцијата на жени.

Учество во работата на годишниот состанок зедоа и министерот за информатичко општество и администрација Дамјан Манчевски, минстерката за правда Рената Дескоска Тренеска и заменик-министерот за правда Оливер Ристовски.

Главен акцент на расправата беа актуелните проблеми на членовите на Синдикатот на УПОЗ во остварувањето на правата од работен однос, како и активностите околу потпишувањето на Гранскиот колективен договор за административните службеници, службениците вработени во правосудните органи и другите вработени во државната управа и правосудните органи, односно финализирање на активностите за негово потпишување. 

Преговорите за потпишување на Гранскиот колективен договор за административните службеници, службениците вработени во правосудните органи и другите вработени во државната управа и правосудните органи меѓу претставниците на Владата и Синдикатот на УПОЗ почнаа кон крајот на август кога беше одржана и првата работна средба на која беше утврдена динамиката со која работните групи од двете страни почнаа да ги усогласуваат евентуалните разлики во Предлог - текстот на Колективниот договор .

Синдикатот на УПОЗ очекува во најскоро време да се потпише Колективниот договор и доколку се потпише тој ќе биде прв Грански колективен договор за административните службеници, службениците вработени во правосудните органи и другите вработени во државната управа и правосудните органи после 1995 година. Во него е предвидено да се добијат поголеми права од оние кои се предвидени во законите.

Во таа насока, претседателот на УПОЗ Пецо Грујовски истакна дека: “она што е важно за Синдикатот е тоа што овој Колективен договор ќе ги уреди и унапреди правата на вработените и што е најважно ќе ги опфати и вработените во правосудството.

Претседателот на Синдикатот на УПОЗ Пецо грујовски исто така истекна дека: „ Со ваквиот социјален дијалог, се создава можност да ги регулираме најбитните права за вработените, штрајковите и протестите да ги замениме со дијалог и преговори за конечно може да се работи во мирна атмосфера. Се отвара можност да ги зголемиме платите, да се изменат посебните закони за службениците во администрацијата и правосудството или да се донесат нови, а во Законот за судска служба да се регулира делот на додатоците на плата што до овој момент ги немаа единствено судските службеници”.

Министерот за информатичко општество и администрација Дамјан Манчевски рече дека потпишувањето на Колективниот договор е значајно и за нив. Потенцираше дека претставници од министерствата за јавна администрација и информатичко општество, за правда, за финансии и за труд и социјална политика, се дел од работната група. Тие заедно со претставниците на Синдикатот разговараат за конкретни решенија и потпишување на нов Колективен договор.

Пред претставнивците на Синдикатот на УПОЗ, министерот Манчевски ги информираше присутните дека работните групи усогласиле некои одредби во Колективниот договор како што се деновите на платено отсуство заради лични и семејни потреби и тоа до седум работни дена во годината и правото на неплатено отсуство. Во институциите каде што има синдикална организација, на претставникот да му биде овозможено да биде дел од функционалната анализа на самата институција, а исто така се утврдил и надоместокот на трошок поврзан со работата и други прашања.  

Лично тој очекува  Колективниот договор наскоро да биде потпишан: ,,Јас сум оптимист и се надевам дека до крајот на оваа година да го потпишеме и да се обидеме да ги задоволиме барањата на Синдикатот. Се разбира, не може се, за некои работи разговаравме и ќе разговараме, за некои се разбравме за некои се критикуваме и така треба да биде”, подвлече Манчевски.

На овој состанок министерот ги информираше присутните членови на Синдикатот и за реформите предвидени во администрацијата за следната година, со цел да се заведе ред во  институциите, но и да се воведе високо административна служба за да се спречи политизацијата на јавната администрација.

Министерот Манчевски пред претседателите на синдикалните организации членки на Синдикатот на УПОЗ најави дека се водат разговори за зголемување на платите во администрацијата кои за кратко време ќе бидат соопштени. Тој потврди дека во буџетот за следната година се предвидени средства за зголемување на плати во администрацијата.

На состанок министерката за правда Рената Дескоска Тренеска потенцираше дека Владата е отворена за социјален дијалог со синдикатите и со сите оние кои се за подобрување на правата на вработените при што рече: „Паралелно со дијалогот за колективен договор имаме и законодавни процеси кои се одвиваат. Во делот на измената на Законот за судска служба, разговаравме за одредени можни решенија со претставниците на УПОЗ и наредниот период ќе бидат донесени измени во Законот за судска служба во делот на додатоците на плата, и истите, да се исплаќаат. Истото се однесува и за јавно - обвинителските службеници”.

Исто така, таа информираше дека на ЕНЕР е објавен Законот за извршување на санкции, на кој процес му претходел дијалог со Синдикатот. Таа најави и зглоемување на платите во рамките и на правосудните органи, и се очекува позитивна одлука во Владата во однос на овие прашања: „Буџетот за судството за следната година ќе биде поголем од оваа година. Се надевам дека ќе овозможиме реализација на овие средства“, рече министерката.

На крајот од расправата претседателот на УПОЗ Пецо Грујовски заклучи дека: „Остануваат отворени неколку прашања кои се однесуваат на барањата на Синдикатот, но важно е дека после долго време имаме Влада која е спремна да ги чуе нашите барања и заеднички да изнајдеме решение за сите проблеми, да имаме социјален дијалог и да потпишуваме колективни договори“. Без конкретни резулатти социјалнот дијалог не би го добил вистинското значење. 

На состанокот се посвети внимание и на проблемот со враќање на платите што им беа незаконски одземени на судските работници за време на штрајкот во 2016 година. Во таа насока, заменик-министерот за правда Ристовски потенцираше дека за решавање на прашањето со одземените плати на судските службеници, наредната недела ќе се одржи средба на која ќе се изнајде можно решение како да се вратат овие пари, со цел да се спречи истите да се наплатат по судски пат и со тоа да биде оштетен и Буџетот на РМ. Притоа тој потенцираше дека Министерство за правда не е директно надлежно за враќање на тие средства, туку тоа е Судскиот буџетски совет.

На состанокот се отворија и други прашања значајни и поврзани со работата на синдикалните организации, формирање на нови синдикални организации, придобивање на нови членови и слично.