Секогаш кога треба да се вратат некои пари на работниците имаме проблем, а за набавка на возила или за други луксузни или било какви потреби на судовите и судиите или за било која институција во државата никогаш не е проблем.

Синдикатот на работниците од управата, правосудните органи и здруженија на граѓани на РМ (УПОЗ) на денешната конференција за медиумите информираше за добиените сознанија за набавка на нови авотмобили на дел од судовите во државава.

Имено, генералниот секретар на Синдикатот на УПОЗ Трпе Деаноски рече дека нивните конкретни барања за зголемување на платите на судските службеници, правилна исплата на додатоците на плата за судските полицајци, воведување на јубилејни награди и регрес за годишен одмор, за жал секогаш се или одбиени или игнорирани со образложение дека законот тоа не го предвидува, и дека нема средства во буџетот, било да е тоа судскиот или на државниот буџет.

 Но, очигледно ова правило важи само кога се работниците во прашање затоа што деновиве сме сведоци дека во Судскиот буџет и буџетот на државата секогаш може да се изнајдат средства кога е потребно и тоа за луксузирање.

„Претседателот на судскиот совет пред неколку денови објави дека Судскиот совет ќе набави две возила, едно во вредност од 40.000,00 евра, а другото во вредност од 16.000,00 евра. Од оние податоци кои ние можевме да ги најдеме отворени се или веќе се реализирани постапки за набавка на нови возила во Врховниот суд во вредност од 16.000,00 евра, Апелациониот суд Гостивар 28.336,00 евра, Основен суд Тетово 20.000,00 евра, Основен суд Велес 16.000,00 евра, 27.000,00 евра во Основниот суд Скопје 2, Апелационен суд Штип 28.000,00 евра, Основен суд Штип 16.000,00 евра, Основен суд Битола 16.000,00 евра и Апелационен суд Битола 28.000,00 евра. Кога ќе се соберат сумите од сите набавки на возила заедно ќе излезе дека Судскиот совет и судовите ќе потрошат приближно околу 250.000,00 евра, пари од работниците и државата за набавка на возила”, рече на денешната конференција за медиумите генералниот секретар на Синдикатот на УПОЗ Трпе Деаноски.

Тој уште рече дека доколку имаа барем малку доблест или совест претседателот и членовите на Судскиот буџетски совет ќе се заложеа овие средства да се искористат на друг начин при тоа алудирајќи на незаконски задржаните пари за време на штрајкот од 2016 година. Или, пак, можеше да се предвиди исплата на додатоци на плата за вработените во судовите, да се набават нови униформи и опрема за судската полиција, или да се донесе одлука за зголемување на платите на вработените во судовите, па макар таа била и еднократна.

Синдикатот на УПОЗ реагира и на изјавата на претседателот на Судскиот совет во која меѓу другото и се заблагодарува на Владата.

„Претседателот на Судскиот совет изјави дека возило од 40.000,00 евра не е луксузно возило, можеби тоа е точно за него, но воопшто не е точно за вработените во судовите чии плати со пресметан работен стаж од 30 години изнесуваат 15 или 16.000,00 денари. Во својата изјава претседателот на Судскиот совет, исто така и се заблагодари на Владата што овозможила да донесе ваква историска одлука за набавка на возила. Ние во оваа прилика сакаме да ја повикаме Владата да го исполни своето ветување и веднаш по завршување на претседателските избори да ги врати неазконски задржаните средства за време на штрајкот во 2016 година, во спротивно ќе се соочи со над 2000 тужби за поврат на овие средства кои ќе нанесат огромна штета на Буџетот на државата”, реагираше Деаноски и уште еднаш ја повика Владата да размисли дали со набавка на возила се наградуваат челниците на правосудството, иако во секој извештај на Европската унија е потенцирано дека најголемите реформи во нашата држава е потребно да се извршат токму во правосудството и Судскиот совет.

Синдикатот на УПОЗ смета дека доколку државата сака успешни предпристапни преговори со Европската унија за поглавјата 23 и 24 како што тоа неколку пати е потенцирано од страна на Владата, потребни се мотивирани судски и административни службеници, а не награди за кочничарите на сите реформи кои треба да се спроведуваат во Македонија. 

На крај Деаноски упатувајќи апел да се реализираат ветувањата од Владата за кои разговараат со неа од 2017 година за враќање на незаконски задржани средства за време на штрајкот, потсети дека до сега на оваа болна тема одржале неколку состаноци и со премиерот и со министерката за правда и со министерот за финансии каде што биле известени дека тие пари се обезбедени, но дека се бара начинот како да се вратат тие пари констатирајќи: ,,Изгледа начинот е многу лесен кога треба да се најдат пари за други освен за работниците. Секогаш кога треба да се вратат некои пари на работниците имаме проблем, а за набавка на возила или за други луксузни или било какви потреби на судовите или за било која институција во државата никогаш не е проблем”.

Претставниците на Синдикатот на УПОЗ учестуваа на јавната расправа по Предлог законот за инспекциски надзор при што во текот на дискусијата ги изскажаа забелешките на синдикатот во однос на овој закон.

Во Собранието на Република Северна Македонија на 19 март 2019 година се одржа 70-та седница на Комисијата за политички систем и односи меѓу заедниците на која беше организирана јавна расправа по Предлог законот за инспекциски надзор.

На Комисијата свое учество зедоа генералниот секретар на Синдикатот на работниците од управата, правосудните органи и здруженија на граѓани на РМ (УПОЗ) Трпе Деаноски кој ги изнесе забелешките по однос на овој закон и претседателот на одборот за инспекциски надзор Димитар Гаќев.

 Пренесувајќи ги забелешките во името на Синдикатот на УПОЗ во врска со Предлог законот за инспекциски надзор Деаноски рече дека иако законотот е Lex specialis и треба да ги регулира сите права од работен однос на инспекторите, повторно се воочува поврзаноста со Законот за административните службеници, особено во категоризацијата и звањата на инспекторите и се уште опстојуваат проблематичните категории: советник инспектор, самостоен инспектор, помошник инспектор и помлад инспектор.

 „Нелогично е, зошто доколку овој Закон треба да биде Lex specialis се дозволува платите на инспекторите да се регулираат со друг закон, односно со Законот за административни службеници. Доколку интенцијата е инспекторите да добијат на значење и да се издвојат од останатите вработени во администрацијата поради специфичноста на нивната работа и ризикот на работењето, би требало со овој Закон да се регулираат и месечните примања со кои би се издвоиле од останатата администрација”, рече во дискусијата генералниот секретар на Синдикатот на УПОЗ Трпе Деаноски.

Следна забелешка на овој Предлог закон е во делот на изборот на членовите на инспекцискиот совет. Синдикатот на УПОЗ смета дека еден од условите за избор на членови на инспекцискиот совет треба да биде и претходното  работно искуство на членот во инспекторатите што во овој случај тоа не е предвидено и единствено се бара работно искуство од областа на дипломирањето.

И во однос на изборот на директорот на инспектортатот беше побарано ова да не биде политичка функција туку за директор на инспекторат да биде именувано или избрано лице кое ќе произлезе од институцијата и ќе ја познава работата на инспекторатот.

Синдикатот на УПОЗ има забелешка и во однос на месечните планови и извештаи пришто Деаноски сугерираше наместо месечен план и месечен извештај да се предвидат годишни или квартални планови и извештаи, бидејќи според него со изготвувањето на извештаи непотребно ќе се обременува работата на инспекторите. Ако на ова уште се надоврзе и недоволниот број на инспектори тогаш навистина работното време на иснпекторите  наместо на терен ќе поминува во канцеларија пишувајќи извештаи. Токму затоа, покрај ова, Синдикатот на УПОЗ смета дека е потребно вработување на нови инспектори и пополнување на испразнетите работни места, бидејќи скоро сите инспекторати имаат многу помал број вработени од она што е предвидено во правилниците за систематизација.

Според Синдикатот, потребно е да се предвидат и нови звања.

„Да се предвидат нови звања за инспекторите од категоријата В, односно инспекторите да не бидат на исто ниво со административните службеници. Не јасно е какви работни задачи би извршувало лицето на ниво Б1 – Генерален инспектор”, се запраша и ги запраша изготвувачите на законот генералниот секретар Трпе Деаноски, кој исто така ги отвори и дилемите во однос на оценувањето сметајќи дека оценувањето се доведува во прашање поради не доволниот број вработени инспектори, кои поради ваквата ситуација повеќе работат на вонредни надзори отколку на редовни кои се зацртани во нивните планови и според кои тие се оценуваат.

Она, пак што го смета за позитивно Синдикатот на УПОЗ и кое е за пофалба е предвидениот додаток на плата за ризик од 30%, наградувањето и осигурувањето од несреќа при работа.

На јавната дебата во Собранието покрај пратениците и претставниците на Синдикатот на УПОЗ учествуваа и невладини организации, институции и други засегнати страни.

Претседателот на Синдикатот на УПОЗ Пецо Грујовски учествуваше на одбележување на 20 годишниот јубилеј од основањето на Синдикатот на управата на Република Српска

Претседателот на Синдикатот на работниците од управата, правосудните органи и здруженија на граѓани на РМ (УПОЗ), Пецо Грујовски се одзва на поканата и присуствуваше на 20 годишниот јубилеј од основањето на Синдикатот на управата на Република Српска што се одржа на 16 март во Добој. На овој начин тој им изрази поддршка за синдикалното движење и упати честитки по повод јубилејот посакувајќи им уште многубројни јубилеји.

Грујовски подвлече дека ова е јубилеј за почит, бидејќи во исто време означува 20 години истрајна борба за подобри услови за работа и борба за подобри права на работниците вработени во управата.

 „Целта на секој синдикат се правата! Право за подобра положба на оние коишто ги застапуваме, право на достоинствена работа, право на достоинствена плата, право на подобри услови за работа, право на подобра законска регулатива, но и право на инсистирање на примена на законските прописи. Вашите и наши барања се многу слични, донекаде и исти. Вие, Синдикатот на управата на Република Српска барате измена на Законот за плати и покачување на платата, ние Синдикатот на УПОЗ баравме и добивме измени на Законот на судска служба со кои и вработените во судовите добија додатоци на плата. Барате да се воспостави Регистар на вработени во управата, а нашата држава веќе го пополнува тој Регистар со кој конечно ќе се преброиме и ќе знаеме на колку работници  егзистенцијата им зависи од буџетот на државата. Вашата власт најави реформа на јавната управа и вие барате и ќе настапите со преговарачка платформа за реформата, а ние веќе сме сред реформа на јавната администрација, исто така обидувајќи се да бидеме дел од неа со свои забелешки, сугестии и цели кои сметаме дека треба да се инкорпорираат во законските измени. Вие барате да нема отпуштања и сите работници да си ги задржат своите работни места, бараме и ние, нашата Влада да ги направи реформите без да им наштети на работниците, односно без отпуштања и без тие да останат без егзизстенција", истакна во своето пригодно обраќање пред присутните претседателот на УПОЗ Пецо Грујовски.  

Тој уште додаде дека синдикалните цели и барања се речиси секаде исти и тоа е она што ги прави синдикатите посилни, затоа што во таа борба, која иако се одвива на различни страни од Балканот ги спојуваат заедничките цели.

Учеството во одбележувањето на 20-годишниот јубилеј на Синдикатот на управата на Република Српска беше можност за отворање на нови плодни соработки и договори на двата синдиката како и другите синдикати кои присуствуваа на прославата.

Овој јубилеј на Синдикатот на управата на Република Српска со своето присуство го збогатија и колегите од Синдикатот на Правосудството на Србија, Синдикат на државните службеници и другите вработени во Федерацијата Босна и Херцеговина, како и претседателот на Конфедерацијата на Синдикати на Република Српска и кои ја истакнаа важноста на синдикатот за сигурноста на работниците.